ڤيديوهات التجارب الغذائية المنتشرة في مواقع التواصل هل هي صحيحة؟!
في المثل الشعبي عندنا يقول (لو كل من جا نجر ما ظل في البر شجر)، في عصرنا الحالي كل شخص بإمكانه تصوير ڤيديو أو كتابة منشور ونشره في مواقع التواصل، ويقولك معلومة طبية ومعلومة صحية. وللأسف المعلومات الخاطئة تنتشر بسرعة كإنتشار النار في الهشيم أسرع من المعلومات الصح لأنها سهلة الهضم لكثير ممن ليس لديه الثقافة العلمية الكافية. صاروا كل الناس علماء وباحثين و ما يستلزم الأمر شي بس خذ لك ولاعة واحرق اي نوع من أنواع الأكل اللي تعتقد انه ضار وإذا احترق أو طلع ريحة يعني هو خطير 😂😂😂
مثلاً المعلم اللي حرق البطاطس في الفصل، واستنتج ان الزيوت المستخدمة في قلي الشيبس ضارة (من المعلوم ان زيت القلي في البيت إذا وصلت له النار يحترق ويسوي كوارث)، طبعاً الشيبسات مو أكل صحي بس مو معناها ان الزيت اللي فيها زيت سيارات😅
اللي بعدوا...المذيع الكويتي اللي حرق جبن شرايح على الهواء مباشرة واستنتج من الريحة ان الجبن مصنوع من البلاستك 😬 يا أنا يامااااا...ابغى طبخة وحدة في العالم تحترق وتطلع ريحة بخور ولا عود أو ريحة لذيذة شي طبيعي محروق ريحته كريهة..
والمبدع المسكت اللي طبخ البيبسي في مقلاة تيفال لحد ما صار قطعة صلبة سوداء عشان يورينا ضرر البيبسي 😁 يااااالهوي...المفروض التجربة تتم تحت ظروف مشابهة للوسط البايلوجي في المعدة من ناحية درجة الحرارة (يعني بطنك مو بحرارة الفرن) والحموضة والأنزيمات وغيرها من العوامل. جربوا طبخوا سكر وماي وخلوه يحترق وشوفوا النتيجة. واحنا صغار الأمهات يسوون حلاوة إزالة شعر الجسم في البيت بماي وسكر وكم نقطة ليمون ولو غفلوا عنها شوي تعطيهم نتيجة البيبسي المتفحم وراح عليهم القدر 😂
ومرة تجربة لطلاب أجانب يبون يثبتون ان برجر ماكدونالدز ينهضم راحوا مغطسينه في حمض حارق مركز جداً وقالوا شوفوا ذاب 😩 طبعاً أنا مو مع فكرة انه ما ينهضم (لأنها هبلة أيضاً)، ولكن التجارب خطأ.
أي تجربة علمية لازم تكون منطقية ومبنية على أساس علمي صحيح ولها نموذج آخر يسمونه "كنترول"، التجربة الخطأ تؤدي لإستنتاج خطأ، ومو كل من جا نجر.
سكينة الحرز
تعليقات
إرسال تعليق